Azərbaycan Respublikasının Gənclər və İdman Nazirliyinin dəstəyi, Azərbaycan Respublikasının Gənclər Fondunun, Dövlət Şəhərsalma və Arxitektura Komitəsinin tərəfdaşlığı və NAYORA-nın təşkilatçılığı ilə “UrbanVisions” Beynəlxalq Gənclər Forumu başlayıb.

Forumun açılışında Gənclər və İdman Naziri Fərid Qayıbov, Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov, NAYORA-nın sədri Rafael Hacıbəyli və Dövlət Şəhərsalma və Arxitektura Komitəsinin Şəhərsalma və ərazilərin inkişafı şöbəsinin müdir müavini Şahnaz Bədəlova çıxış ediblər.

Onlar çıxışlarında dayanıqlı və ekoloji şəhərsalmanın əhəmiyyəti, sosial inklüzivlik, innovativ texnologiyaların tətbiqi və gənclərin şəhərsalma sahəsində fəallığının artırılması mövzularına toxunublar. Qeyd edilib ki, belə tədbirlər gənclərin kreativ ideyalarının cəmiyyətə töhfə verməsi üçün mühüm platformadır.

Açılış mərasimindən sonra forum panel müzakirə ilə davam edib. Panel müzakirədə Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin Şəhərsalma və memarlıq şöbəsinin müdir müavini Aytac Əlisultanlı, “MANARCH” memarlıq bürosunun təsisçisi və baş memarı İlqar Manafsoy, “Mühit” memarlıq bürosunun həmtəsisçisi və baş memarı Toğrul Bayramov və ARPO Şəhər Yenidənqurma Departamentinin “Urban Architects” üzrə baş direktoru Nikolay Novikov ekspert qismində iştirak ediblər.

Müzakirələrdə şəhərsalma sahəsində ən son yanaşmalar, ekoloji və sosial aspektlərin birləşdirilməsi, eləcə də yeni texnologiyaların tətbiqinin şəhər dizaynına təsiri mövzuları geniş şəkildə müzakirə edilib. Ekspertlər öz təcrübələrini və perspektivlərini iştirakçılarla bölüşüblər.

Daha sonra iştirakçılar Dövlət Şəhərsalma və Arxitektura Komitəsi tərəfindən seçilən iki əraziyə baxış keçirib və həmin ərazilər üçün layihə hazırlıqlarına başlayıblar.

Forum 8 dekabr tarixinə qədər davam edəcək.