6-8 dekabr tarixlərində keçirilən “UrbanVisions” Beynəlxalq Gənclər Forumu çərçivəsində Bakı şəhərinin 2040-cı il Baş Planında göstərilmiş iki ərazi üzrə hazırlanan layihələr təqdim edildi. Forumda ümumilikdə 60 gənc iştirak edib, bunlardan 30-u 11 fərqli ölkəni təmsil edən beynəlxalq iştirakçılar idi. Layihələr dayanıqlılıq, yaradıcılıq və tətbiq olunma potensialına görə qiymətləndirildi.

Yekunda münsiflər heyətinin qərarı ilə 3-cü və 6-cı komandalar qalib elan olundu və qaliblərə mükafatlar təqdim edildi.

Forum çərçivəsində iştirakçılar ekspertlərlə birgə işləyərək ekoloji cəhətdən dayanıqlı və insan-yönümlü şəhərsalma konsepsiyaları hazırladılar. Layihələr həm nəzəri biliklərə, həm də praktiki həllərə əsaslanaraq hazırlandı.

Bu tədbir Gənclər və İdman Nazirliyinin dəstəyi, Gənclər Fondu və Dövlət Şəhərsalma və Arxitektura Komitəsinin tərəfdaşlığı, NAYORA-nın isə təşkilatçılığı ilə baş tutdu. Forum Gənclər və İdman Nazirliyinin gənclər təşkilatları üçün 2024-cü il üzrə elan etdiyi qrant müsabiqəsi çərçivəsində həyata keçirildi.

“UrbanVisions” forumu, beynəlxalq və yerli gənclərin birgə əməkdaşlığı ilə şəhərsalma sahəsində yeni yanaşmaların təqdim olunduğu bir platforma oldu.