📣 2 Fevral Gənclər günü münasibəti ilə “GƏNCLƏR GÜNÜ #BİRLİKDƏ: Gənclər Təşkilatlarının Şəbəkələşmə Tədbiri” keçirilib.

Tədbir çərçivəsində gənclər təşkilatlarının rəhbər və nümayəndələri bir araya gəlib, əməkdaşlıq imkanlarını müzakirə edib və təcrübə mübadiləsi aparıblar. 

Azərbaycan Respublikası Gənclər Fondunun dəstəyi və NAYORA-nın təşkilatçılığı ilə keçirilən tədbirin açılış nitqində çıxış edən NAYORA-nın sədri Rafael Hacıbəyli gənclər təşkilatlarında fəaliyyət göstərən hər bir gənci Azərbaycan Gənclər Günü münasibətilə təbrik edib. O, ölkəmizin istedadlı və potensiallı gənclərinə dövlət tərəfindən göstərilən dəstək və yaradılan imkanlardan bəhs edərək, bu diqqətin gənclərin inkişafına mühüm töhfə verdiyini vurğulayıb.

Eyni zamanda, 2025-ci ilin Gənclər üçün Prezident Mükafatına layiq görüldüyü üçün cənab Prezidentə dərin minnətdarlığını ifadə edib, bu uğurların dövlətimizin gənclərə göstərdiyi diqqət və qayğının nəticəsi olduğunu vurğulayıb və bu etimadı doğrultmaq naminə gənclər təşkilatlarının ilə birlikdə dövlət gənclər siyasətinə öz töhfəsini verməyə və daha sıx əməkdaşlıq etməyə davam edəcəyini bildirib.

Daha sonra isə Azərbaycan Gənclər Fondunun gənclər təşkilatları ilə iş şöbəsinin müdiri Orduxan Qəhrəmanzadə və Azərbaycan Respublikası Gənclər və İdman Nazirliyinin gənclərlə iş şöbəsinin müdir müavini Ülviyə Axundova çıxış etmişdir. Onlar gənclər təşkilatlarını Gənclər Günü münasibətilə təbrik etmiş, bu cür tədbirlərin gənclər təşkilatları arasında əlaqələrin genişləndirilməsi və yeni ortaq layihələrin müzakirəsi üçün mühüm imkan yaratdığını vurğulamışdır.

Tədbirin davamında gənclər təşkilatlarının nümayəndələri arasında müxtəlif müzakirələr aparılıb, fikir və təcrübə mübadiləsi baş tutub. Daha sonra isə konsert proqramı və əyləncəli oyunlarla davam edən tədbir gənclər üçün həm faydalı, həm də rəngarəng olub.

#AzGF #NAYORA #Gənclərgünü #Gənclərüçün

None