Ağstafa “BİRLİK” Regional Festivalı başa çatdı!

Azərbaycan Respublikası Gənclər və İdman Nazirliyinin dəstəyi və Azərbaycan Respublikası Gənclər Təşkilatları Milli Şurasının (NAYORA) təşkilatçılığı ilə Ağstafa “BİRLİK” Regional Festivalı uğurla baş tutdu.

Festival Azərbaycan Respublikasının dövlət himninin səsləndirilməsi və şəhidlərimizin xatirəsinin dərin ehtiramla yad edilməsi ilə başladı. Ardınca rəsmi açılış mərasimi keçirildi. Tədbirdə Ağstafa Rayon İcra Hakimiyyətinin başçısı Seymur Orucov və digər rəsmi şəxslər çıxış edərək gənclərin inkişafı və milli dəyərlərin qorunması barədə vacib məqamları vurğuladılar.

Daha sonra gənclər təşkilatlarının nümayəndələri qurulan stendlərdə öz təşkilatları və həyata keçirdikləri layihələr haqqında məlumat verdilər. Bununla yanaşı, onlar müxtəlif yarışmalar təşkil etdilər və yarışlar əsasında qalib gənclərə hədiyyələr, həmçinin öz təşkilatlarını təmsil edən promo məhsullar təqdim etdilər.

Günün sonunda keçirilən açıq hava konserti iştirakçılara unudulmaz anlar yaşatdı. Müxtəlif gənc ifaçılar səhnə alaraq təqdim etdikləri ifalarla festival iştirakçılarının yaddaşında iz buraxdılar.

Qeyd edək ki, “BİRLİK” Regional Festivalı 5 regionda keçirilməsi nəzərdə tutulmuşdur. Daha əvvəl Quba, Sabirabad, Mingəçevir və Gəncədə baş tutmuş, son olaraq isə Ağstafa regionunda keçirilməklə layihə yekunlaşmışdır.