Panel müzakirəsində professor-tarixçi Gülanə Əliyeva, ESN Azərbaycan Milli Şurasının üzvü Yaqub Əhmədov, Avropa Tələbələr Forumu-Bakı (AEGEE-Bakı) Mərkəzi Nəzarət-Təftiş Komissiyasının üzvü Kamilla Məmmədova, beynəlxalq təşkilatların nümayəndələri, yerli və əcnəbi tələbələr, eləcə də müxtəlif ölkələrdən olan gənclər iştirak ediblər.

Panel müzakirəsi zamanı çıxış edənlər 20 Yanvar hadisələrinin təkcə faciəli gün olmadığını, həm də xalqın azadlıq mübarizəsinin və milli iradəsinin simvoluna çevrildiyini vurğulayıblar. Xarici iştirakçılara həmin dövrdə baş verən hadisələr, şəhidlərin qəhrəmanlığı, Azərbaycanın müstəqillik uğrunda mübarizəsi haqqında geniş məlumat verilib.
İştirakçılar arasında müzakirələr aparılıb. Xarici qonaqlar 20 Yanvar hadisələri ilə bağlı suallarını verib, fikir və təəssüratlarını bölüşüblər. Tədbir həm də müxtəlif xalqların azadlıq uğrunda apardığı mübarizəyə nəzər salmaq, onların Azərbaycan xalqının mübarizəsi ilə oxşarlıqlarını müzakirə etmək üçün platformaya çevrilib.