Bakı Konqres Mərkəzində Azərbaycan Respublikası Gənclər Təşkilatları Milli Şurasının (NAYORA) Üzvlər Məclisi baş tutub. Tədbir Azərbaycanın Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Məclisin ilk hissəsində NAYORA-nın sədri Rafael Hacıbəyli tədbir iştirakçılarını salamlayıb. Daha sonra Azərbaycan Respublikası Gənclər Fondunun Gənclər təşkilatları ilə iş şöbəsinin müdiri vəzifəsini icra edən Orduxan Qəhrəmanzadə çıxış edərək Fondun gənclər təşkilatlarına dəstəyindən və onların layihələrinin uğurla həyata keçirilməsi üçün yaradılan şəraitdən danışıb.

Daha sonra iştirakçıların sayı müəyyən edilib və yetərsay təsdiqləndikdən sonra Məclis sədri vəzifəsinə Elməddin Behbud, Məclisin katibi vəzifəsinə isə Murad Yusifli seçilib. Elməddin Behbud açılış nitqi ilə çıxış edib.

Gündəliyin səsvermə yolu ilə təsdiqindən sonra NAYORA-nın 2024-cü ilin iyul-oktyabr aylarını əhatə edən fəaliyyət hesabatı təqdim olunub. Sədr Rafael Hacıbəyli, baş katib Nərminə Hüseynzadə və Mərkəzi Nəzarət-Təftiş Komissiyasının sədri Aynurə Salmanlı hesabat çərçivəsində NAYORA-nın fəaliyyətləri barədə məlumat veriblər. Eyni zamanda, təşkilatın cari fəaliyyətinə dair video hesabat nümayiş etdirilib.

Məclisin davamında NAYORA-ya üzvlük üçün müraciət edən gənclər təşkilatları təqdimatla çıxış ediblər.

“ADDIM” Gənclərin İnkişaf Mərkəzi İctimai Birliyinin sədr müavini Kamil Həmidov və “SOS Uşaq Kəndləri-Azərbaycan” İctimai Birliyinin milli gənclər inkişafı üzrə məsləhətçisi Gülsüm Məmmədova təşkilatlarının məqsəd və fəaliyyətləri barədə danışaraq üzvlük üçün müraciətlərini təqdim ediblər.

Səsvermə nəticəsində hər iki təşkilatın NAYORA-ya üzvlüyü təsdiqlənib.

NAYORA Üzvlər Məclisinin işində iştirak edən və dəstək göstərən bütün təşkilatlara və nümayəndələrə təşəkkür edirik!