Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, Azərbaycan Respublikasının Vəkillər Kollegiyasının və Azərbaycan Respublikası Gənclər Təşkilatları Milli Şurasının tərəfdaşlığı, ELSA Azərbaycan və “ProDemos - Xalq üçün”ün birgə təşkilatçılığı ilə ödənişsiz hüquqi yardım xidməti həyata keçirilməkdədir.

Xidmət çərçivəsində Vəkillər Kollegiyası üzvlərinin iştirakı ilə vətəndaşların sualları vəkil qurumlarında əyani formada və ödənişsiz olaraq cavablandırılır, qanunvericiliklə nəzərdə tutulmuş hallarda onların məhkəmədə dövlət hesabına təmsil olunması üçün dəstək göstərilir. Bunun üçün "ProDemos-Xalq üçün" layihəsinin veb-saytından (prodemos.az) müvafiq anketi dolduraraq layihəyə müraciət etməyiniz kifayətdir.

Ödənişsiz hüquqi yardım almaq hüququna malik olan şəxslər kateqoriyasına aşağıdakılar aid edilir:

- Orqanizmin funksiyalarının 61-100 faiz pozulmasına görə əlilliyi müəyyən edilmiş (yəni 1-ci və ya 2-ci dərəcə əlilliyi olan) və işləməyən şəxslər;

- 18 yaşınadək əlilliyi müəyyən edilmiş şəxslər;

- İnsan alverinin qurbanları;

- Məişət zorakılığından zərər çəkmiş şəxslər;

- Valideynini itirmiş uşaqlar;

- Valideyn himayəsindən məhrum olunmuş uşaqlar;

- Ünvanlı dövlət sosial yardımı alan ailələrin üzvləri;

- İşsiz kimi qeydiyyatda olan şəxslər;

- Maddi vəziyyəti yaşayış minimumundan (ölkə üzrə 270 manat, əmək qabiliyyətli əhali üçün 287 manat, pensiyaçılar üçün 222 manat, uşaqlar üçün 235 manat) əhəmiyyətli dərəcədə aşağı olan və bu hal məhkəmə tərəfindən qiymətləndirilən digər şəxslər.