Azərbaycan Texniki Universitetində (AzTU) 44 günlük Vətən müharibəsində qazanılan zəfərin 4-cü ildönümünə həsr olunmuş “Zəfərin Sədası” adlı tədbir keçirilib. 🇦🇿

Azərbaycan Respublikası Gənclər Fondunun dəstəyi, Azərbaycan Gənclər Təşkilatları Milli Şurası, Azərbaycan Texniki Universiteti, “Gənclərin Maarifləndirilməsinə Dəstək” İctimai Birliyi və “Böyük Qayıdış” Gənclər Təşkilatının birgə təşkilatçılığı ilə baş tutan tədbir, Vətən uğrunda canlarını qurban verən şəhidlərimizin xatirəsinə bir dəqiqəlik sükutla başlayıb, ardından Azərbaycanın Dövlət Himni səsləndirilib. 

📌 Tədbirdə AzTU-nun rektoru Vilayət Vəliyev, Milli Məclisin deputatı Naqif Həmzəyev, “Böyük Qayıdış” Gənclər Təşkilatının sədri Nail Şükürov, “Gənclərin Maarifləndirilməsinə Dəstək” İctimai Birliyinin sədri Aynurə Ələkbərli, Gənclər Təşkilatları Milli Şurasının baş katibi Nərminə Hüseynzadə, həmçinin qazi anası Afət Muradova, Xüsusi Təyinatlı Qüvvələrin ehtiyatda olan mayoru Elşad Təhməzov və AzTU-nun müəllimi, Birinci Qarabağ müharibəsinin iştirakçısı Rasim Həşimov çıxış ediblər.

Çıxışlar zamanı 44 günlük Vətən müharibəsindəki əzmkarlıq, mübarizə və qələbənin gənclər üçün əhəmiyyəti geniş şəkildə müzakirə edilib. Həmçinin, Vətən uğrunda canlarından keçən şəhidlərin və qazilərin fədakarlıqları xüsusi olaraq vurğulanıb. Tədbirdə, bu qəhrəmanların gənclər üçün örnək olduğu, Zəfər Gününün isə gənclərin vətənpərvərlik ruhunun daha da möhkəmlənməsinə səbəb olduğu qeyd edilib. Çıxışçılar, bu zəfərin, gəncləri gələcəkdə daha güclü və məsuliyyətli vətəndaşlar olaraq yetişdirməyə töhfə verdiyini bildiriblər.
Tədbirin bədii hissəsində Azərbaycan Texniki Universitetinin gənclərinin hazırladığı videoçarx nümayiş etdirilib. Tədbir, gənclərin səsləndirdiyi şeirlər, xanəndə və ifaçıların mahnıları, eləcə də rəqs nömrələri ilə davam edib.

Bu tədbir, iştirakçılara Zəfər Gününün şanlı tarixini bir daha xatırlamağa və Azərbaycanın gələcəyinə böyük inamla baxmağa fürsət yaratdı.